لاہور+ڈیرہ غازیخان( نامہ نگار+نوائے وقت رپورٹ) لاہور اور ڈیرہ غازیخان میں ٹریفک حادثات میں 5افراد جاں بحق اور 13زخمی ہو گئے۔ لاہور مستی گیٹ کے علاقے میں باراتیوں سے بھری بس نے موٹر سائیکل سوار2دوستوں کو کچل دیا، ایک موقع پر جاں بحق دوسرا شدید زخمی ہو گیا۔بادامی باغ کے شہزاد احمد کا19سالہ بیٹا خرم شہزاد دوست ندیم کے ساتھ موٹر سائیکل پر جا رہا تھا کہ باراتیوں سے بھری تیز رفتار بس نے بے قابو ہو کر کچل ڈالا۔ دونوںکو ہسپتال پہنچا یا گیا، جہاں خرم شہزاد زخموں کی تاب نہ لاتے ہوئے دم توڑ گیا، زخمی کی حالت تشویشناک بتائی جاتی ہے۔ پولیس نے بس ڈرائیور ابراہیم کو گرفتار کر لیا۔ادھر لاہور کے علاقے رائیونڈ میں واقع اڈا پلاٹ کے قریب تیز رفتار ٹریکٹر بے قابو ہو کر کیری ڈبے سے ٹکرا گیا جس کے نتیجے میں کیری ڈبے کا ڈرائیور طارق اسلم موقع پر جاں بحق ہو گیا جبکہ کیری ڈبہ میں سوار فیکٹری ملازم زخمی ہو گیا۔ڈیرہ غازیخان میں مسافر بس کراچی سے پشاور جا رہی تھی کہ ڈیرہ غازیخان انڈس ہائی وے پر یارو موڑ کے قریب دھند کی وجہ سے ٹریکٹر ٹرالی سے جا ٹکرائی۔ حادثے میں مسافر بس کے ڈرائیور سمیت3افراد موقع پر ہی جاں بحق ہو گئے، مرنے والوں میں ایک خاتون بھی شامل ہے۔ حادثے کے11زخمیوں کو ٹیچنگ ہسپتال میں طبی امداد دی جا رہی ہے۔