قصور، فیصل آباد، کسووال اور اوکاڑہ میں 2 خواتین سمیت 4 افراد سے زیادتی
لاہور (نمائندگان) زیادتی کے واقعات میں اوباشوں نے 2 خواتین اور 2 لڑکوں کو ہوس کا نشانہ بنا دیا۔ تفصیل کے مطابق کنگن پور کی رہائشی خورشید بی بی نے پولیس کو اطلاع دی کہ عدنان اور طارق موٹر سائیکل پر میری بیٹی سونیا کو اغوا کرکے لے گئے اور گندے کھوہ کے ٹاور میں لے جاکر ہوس کا نشانہ بنا دیا۔ فیصل آباد کے علاقہ چکیاں والا چوک میں امجد اور عثمان نے پندرہ سالہ نعمان کو کھیت میں لیجاکر ہوس کا نشانہ بنا ڈالا۔ کسووال پولیس کے مطابق ناہید اختر نے درخواست دی ہے کہ میرے 12 سالہ بیٹے احتشام کو محمد سلیم، محبوب احمد، محمد عابد نے میلہ دیکھنے کے بہانے فصلوں میں اجتماعی زیادتی کا نشانہ بنا ڈالا۔ اوکاڑہ کے نواحی قصبہ 20 جیڈی کی رہائشی صغریٰ بی بی گھر سوئی ہوئی تھی کہ اعجاز دو نامعلوم ساتھیوں کے ہمراہ دیوار پھلانگ کر گھر میں داخل ہوا اور صغریٰ بی بی کو زیادتی کا نشانہ بنادیا جبکہ ملزم کو گرفتار کرلیا گیا۔ پولیس نے واقعات کیخلاف مقدمات درج کرلئے۔
