خیبر ایجنسی+ سبی (نوائے وقت رپورٹ+ آئی این پی) خیبر ایجنسی کی تحصیل وادی تیراہ کے علاقے راچکال میں جیٹ طیاروں کی بمباری میں 8 دہشت گرد ہلاک ہو گئے۔ کارروائی میں دہشت گردوں کے زیراستعمال دو ٹھکانے بھی تباہ کر دیئے گئے۔ جبکہ سبی میں سکیورٹی فورسز اور حساس اداروں کی کارروائی کے دوران فائرنگ کے تبادلے میں پانچ شدت پسند مارے گئے، بھاری تعداد میں گولہ بارود برآمد کر لیا گیا۔ ایف سی و حساس اداروں نے تلی و گرد و نواح میں سرچ آپریشن کیا تو دہشت گردوں نے فورسز کو دیکھتے ہی جدید اسلحہ سے فائرنگ کردی جوابی فائرنگ کے نتیجے میں پانچ دم توڑ گئے جن کے قبضے سے پانچ ایس ایم جی رائفلز، بارودی مواد لاکٹ و بھاری تعداد میں اسلحہ و گولہ بارود برآمد کرلیا دوران کاروائی تین ٹھکانے بھی مکمل طور پر مسمار کر دئیے گئے۔ ایف سی کے ترجمان کے مطابق مارے جانے والے دہشت گرد مسافر ٹرینوں سمیت دیگر سنگین واراتوں میں ملوث تھے۔ خوشاب سے نامہ نگار کے مطابق سی ٹی ڈی نے خوشاب لاری اڈے پر کارروائی کر کے القاعدہ کے دہشت گرد وقاص ولد فاروق شاہ ساکن داؤد خیل ضلع میانوالی کو گرفتار کر لیا اور اسکے قبضے سے خودکش جیکٹ اور بارودی مواد برآمد کر لیا گیا۔