کراچی (کرائم رپورٹر) کراچی کے مختلف علاقوں میں فائرنگ کے واقعات میں سکیورٹی گارڈ سمیت 2 افراد ہلاک اور تین زخمی ہوگئے۔ تفصیلات کے مطابق میٹھا در کے علاقے میں آئی آئی چندریگر روڈ پر نامعلوم افراد نے 60 سالہ محمد خان کو فائرنگ کرکے ہلاک کردیا اور فرار ہوگئے۔ پولیس کے مطابق مقتول محمد خان پرائیویٹ سکیورٹی کمپنی میں گارڈ تھا۔ ادھر کورنگی کے علاقے ضیا کالونی میں نامعلوم افراد کی فائرنگ سے ایک خاتون 25 سالہ عروسہ زخمی ہوگئی۔اس کے علاوہ اورنگی ٹائون میں فائرنگ سے ایک شخص ہلاک ہوگیا۔ علاوہ ازیں قانون نافذ کرنے والے اداروں نے صدر میں واقع موبائل فون مارکیٹ میں کارروائی کرتے ہوئے سیاسی جماعت کے سابق عہدیدار کو حراست میں لے کر نامعلوم مقام پرمنتقل کردیا۔ ذرائع کے مطابق ملزم مرسلین سیاسی جماعت کے لیاری سیکٹر کا سابق عہدیدار اور ٹارگٹ کلنگ کے علاوہ زمینوں پر ناجائز قبضے میں ملوث ہے۔