قصور + کوٹ رادھا کشن + رائیونڈ+ اوکاڑہ (نامہ نگاران) علامہ اقبال ایکسپریس کی زد میں آ کر چچا ،بھتیجا جاں بحق جبکہ خیبر میل کے نیچے آکر شہری زندگی کی بازی ہار گیا۔ قصور سے نمائندہ نوائے وقت کے مطابق پیر گھرانہ کوٹ رادھاکشن کا رہائشی 75سالہ محمد عزیر اپنے بھتیجے محمد طفیل 60سال کیساتھ اٹاری اجیت سنگھ کے قریب ٹرین کی پٹڑی کراس کررہا تھا کہ کراچی سے سیالکوٹ جانے والی علامہ اقبال ایکسپریس نے ٹکر ماری جس کے نتیجہ میں چچا، بھتیجا موقع پر ہی جاں بحق ہوگئے۔ رائیونڈ میں جھلارکے قریب کوٹ بابو خان میں2 سالہ عبدالرحمن ریلوے لائن کے پاس ٹرین کے پریشر کی زد جاں بحق ہوگیا۔ عبدالرحمن اپنے والد عبدالرحمن کے ساتھ موٹر سائیکل پر جا رہا تھا پٹڑی کراس کرتے اچانک ٹرین آگئی اور بچہ ٹرین کے پریشر کی زد میں آکر کئی گز کے فاصلے پر پتھر لگنے نے شدید زخمی ہوگیا۔ اسے فوری طور پر ہسپتال لے جایا گیا تاہم وہ جانبر نہ ہوسکا۔ دریں اثنا اوکاڑہ کے نواحی علاقہ کرمانوالہ کے قریب بہاولنگر کا رہائشی مبین نامی شخص لاہور سے کراچی جانے والی خیبر میل کے نیچے آ کر موقع پر جاں بحق ہوگیا۔