لاہور(سپورٹس رپورٹر+نمائندہ سپورٹس) 63 ویں نیشنل ہاکی چیمپئن شپ آج سے شروع ہوگی۔ 13 محکمہ جاتی ٹیمیں حصہ لے رہی ہیں جنہیں چار گروپس میں تقسیم کیا گیا ہے۔ یہ بات ڈائریکٹر ڈومیسٹک اینڈ ڈیویلپمنٹ پی ایچ ایف نوید عالم، ٹورنامنٹ ڈائریکٹر مصدق حسین اور آرگنائزنگ سیکرٹری مسعود الرحمان نے نیشنل ہاکی سٹیڈیم میں پریس کانفرنس کرتے ہوئے بتائی۔ ٹیموں میں پی آئی اے، نیوی، ریلویز کو گروپ اے میں ، واپڈا، سوئی سدرن گیس کمپنی اور ایچ ای سی کو گروپ بی میں، نیشنل بنک، پورٹ قاسم اتھارٹی، پولیس اور پی ٹی وی کو گروپ سی جبکہ آرمی، سوئی نادرن گیس پائپ لائن اور پی اے ایف کو گروپ ڈی میں رکھا گیا ہے۔23 سے 27 دسمبر تک کھیلے جانے والے پہلے راونڈ میں پریمیئر لیگ کے میچز کھیلے جائیں گے۔