اسلام آباد (نوائے وقت رپورٹ) نجی ٹی وی کو انٹرویو میں اپوزیشن لیڈر خورشید شاہ نے کہا ہے کہ قطر کی بات ہم نے نہیں کی۔ میاں نواز شریف کی آستین میں سانپ ہیں جو انہیں ڈس گئے، آصف زرداری کی واپسی میں ایک تاریخ ہے۔ وہ سیاست میں کافی عرصے سے ہیں۔ ان کی واپسی ضروری تھی۔ وہ سینئر ہیں اور ان کے یہاں کے لوگوں کے ساتھ تعلقات ہیں وہ 11سال جیل میں رہے۔ مجھے نہیں معلوم بے نظیر نے زرداری صاحب کو سیاست سے کیوں الگ رکھا۔ بے نظیر کی شہادت کے وقت اگر زرداری صاحب قیادت نہ سنبھالتے تو لیڈر شپ کا بڑا فقدان ہو جانا تھا۔ پیپلز پارٹی کیلئے سب سے بڑی بات ریاست کے لوگوں کی حفاظت کی ہے۔ کوئٹہ کمشن کی رپورٹ کو سیاستدانوں نے لتاڑ کر 1998کی تاریخ دہرائی۔ پیپلز پارٹی کبھی دہشتگردی کی پالیسی پر سمجھوتہ نہیں کر سکتی۔ آف شور کمپنی اگر قانونی طریقے سے ہے تو جائز ہے۔ نواز لیگ نے تو اعلان کیا تھا سڑکوں پر گھسیٹیں گے۔ سوئس بنکوں سے پیسہ واپس لائیں گے ضرور لاؤ مگر پہلے اربوں کا اپنا تو حساب دو۔