سکھر (آن لائن+ نوائے وقت نیوز) سکھر اور جامشورو میں ٹریفک حادثات میں 3 خواتین سمیت 9 افراد جاں بحق اور 30 زخمی ہو گئے۔ تفصیلات کے مطابق سکھر میں سانگی کے قریب تیز رفتار کوچ الٹنے سے تین خواتین سمیت پانچ افراد جاں بحق اور 18 سے زائد زخمی ہو گئے۔ بد قسمت کوچ پنجاب سے کراچی کی طرف آرہی تھی سکھر کے علاقے سانگی کے قریب قومی شاہراہ پر تیز رفتاری کے باعث الٹ گئی۔ حادثے کے نتیجے میں 18 سے زائد مسافر زخمی ہو گئے جس میں سے پانچ زندگی کی بازی ہار گئے۔ حادثے کی اطلاع پر پولیس اور ریسکیو ٹیمیں موقع پرپہنچ گئیں۔ زخمیوں کو سکھر اور پنو عاقل کے ہسپتالوں میں منتقل کیا گیا۔ ریسکیو حکام کے مطابق متعدد زخمیوں کی حالت تشویشناک ہے۔ جاں بحق ہونیوالوں میں ایک بچی بھی شامل ہے۔ دوسری جانب جامشورو میں انڈس ہائی وے پر کوچ اور ٹرک کے درمیان تصادم کے نتیجے میں 4 افراد جاں بحق جبکہ 12 زخمی ہو گئے۔ ریسکیو حکام نے نعشوں کو سردخانے اور زخمیوں کو ہسپتال منتقل کر دیا جہاں انہیں طبی امداد دی جا رہی ہے۔ پولیس حکام کا کہنا تھا بظاہر حادثہ تیز رفتاری کی وجہ سے پیش آیا۔