کراچی (نوائے وقت رپورٹ + کرائم رپورٹر) کراچی کے علاقے گلشن چورنگی میں ٹارگٹ کلنگ میں ایک شخص جاں بحق ہو گیا، مقتول کی شناخت راشد ولد نذیر کے نام سے ہوئی جو لیاری کا رہائشی تھا۔ پولیس کے مطابق واقعہ ٹارگٹ کلنگ کا نتیجہ ہے، مقتول پی آئی اے کے افسر کا ڈرائیور تھا اسے سر میں گولی ماری گئی۔ علاوہ ازیں کراچی کے علاقے سائٹ ایریا میں پولیس اور حساس ادارے کے چھاپے کے دوران 3 دہشتگردوں کو گرفتار کر لیا گیا۔ سائیٹ ایریا باوانی چالی میں پولیس اور حساس ادارے نے دہشتگردوں کی موجودگی کی اطلاع پر سرچ آپریشن کیا۔ کارروائی کے دوران گھر گھر تلاشی لی گئی۔ پولیس کے مطابق تلاشی کے دوران کالعدم جماعت کے تین دہشتگردوں کو گرفتار کر لیا گیا۔ گرفتار دہشتگردوں کے قبضے سے ڈیٹونیٹر، بارودی مواد، بال بیرنگ اور بم برآمد کر لئے گئے ہیں۔ ملزمان شہر میں تخریب کاری کا منصوبہ بنا رہے تھے۔