بھارتی عالم دین نے داڑھی کاٹ کر مودی کا منہ کالا کرنے والے کو 25 لاکھ روپے انعام دینے کا اعلان کردیا
کولکتہ (آئی این پی) بھارتی عالم دین نے مودی کی داڑھی کاٹ کر اور انہیں گنجا کرکے منہ کالا کرنے والے کو 25 لاکھ روپے انعام دینے کا اعلان کردیا۔ مغربی بنگال سے تعلق رکھنے والے ٹیپو سلطان مسجد کے شاہی امام مولانا نورالرحمان برکاتی اور مسجد کی شوری نے بھارتی وزیراعظم نریندر مودی کے خلاف بیان جاری کیا ہے جس میں کہا گیا ہے کہ نوٹوں کی تبدیلی کے مسئلے کے بعد عام آدمی کے مسائل میں روز بروز اضافہ ہوتا جارہا ہے جب کہ بھارت کے زیادہ تر عوام ممتا بینرجی کو وزیراعظم کے طور پر دیکھنا چاہتے ہیں۔ مولانا نورالرحمان برکاتی کا کہنا تھا کہ نریندر مودی کا داڑھی رکھنا جعل سازی ہے لہٰذا جو بھی مودی کی داڑھی کاٹ کر اور انہیں گنجا کرکے ان کا منہ کالا کرے گا اس کو 25 لاکھ روپے انعام دیا جائے گا۔
