راولاکوٹ :بس کھائی میں گرنے سے 6 مسافر مارے گئے 24 زخمی
لاہور/راولاکوٹ (نامہ نگاران+ ایجنسیاں) شیخوپورہ، سیالکوٹ‘ ساہیوال سرگودھا، فیصل آباد اور چیچہ وطنی میں ٹریفک حادثات کے دوران بہن بھائی اور باپ بیٹے سمیت 10افراد جاںبحق ہوگئے جبکہ راولا کوٹ میں بس کھائی میں گرنے سے 6مسافر مارے گئے۔ شیخوپورہ، سے نمائندہ نوائے وقت کے مطابق سرگودھا روڈ ماچھیکے کے قریب ڈمپر اور موٹرسائیکل کی ٹکر سے دو افراد جابحق ہو گئے مرنے والے موٹرسائیکل سوار جھامکے کے رہائشی بتائے جاتے ہیں۔ سیالکوٹ سے نامہ نگار کے مطابق تھانہ نیکاپورہ کے علاقہ ایمن آباد روڈ پر عمیر سلیم موٹر سائیکل پر اپنی بہن چوبیس سالہ سائرہ سلیم اور اڑھائی ماہ کے سوتیلے بھائی حذیفہ کو لے کر جا رہا تھا تیز رفتار بس نے موٹر سائیکل کو ٹکر مار دی جس کے نتیجہ میں سائرہ سلیم اور حذیفہ موقع پر ہی جاں بحق ہو گئے۔ ساہیوال/سرگودھا سے نامہ نگار کے مطابق فاروقہ کا رہائشی محمد یعقوب اپنے چار سالہ بیٹے عبداللہ کے ہمراہ موٹر سائیکل پر ساہیوال آرہے تھے کوٹ اکرم کے قریب ساہیوال سے سلانوالی جانے والے 124 چک کے رہائشی سرفراز کی موٹر سائیکل آمنے سامنے ٹکرا گئیں جس کے نتیجہ میں باپ بیٹا موقع پر ہی جاںبحق ہو گئے۔ فیصل آباد سے نمائندہ خصوصی کے مطابق تھانہ ساہیانوالہ میں تعینات پولیس کانسٹیبل 30سالہ انجم مرتضیٰ تھانہ سے سی پی او آفس کی جانب جا رہا تھا اپنے آبائی گائوں چک نمبر126ر ب سالار والا کے قریب موٹرسائیکل ریڑھی سے ٹکرا گیا جس کے نتیجہ میں کانسٹیبل انجم موقع پر ہی جاں بحق ہو گیا جبکہ باجوہ کالونی سرگودھا کے رہائشی ظہیر ہسپتال میں زخموں کی تاب نہ لاتے ہوئے جاں بحق ہو گیا ۔ آزادکشمیر میں مسافر بس تیزرفتاری کے باعث کھائی میں جا گری جس کے نتیجے میں دو خواتین سمیت 6 افراد جاں بحق اور 24 زخمی ہوگئے۔ ریسکیو ذرائع کا کہنا تھا کہ مسافر بس راولپنڈی سے فاروڈ کہوٹہ جا رہی تھی حادثہ راولاکوٹ علاقے ہجیرہ کے مقام پر پیش آیا جہاں وہ برفباری کی وجہ بے قابو ہو کر کھائی میں جاگری۔ حادثے میں 24کے قریب مسافر زخمی بھی ہوئے۔ چیچہ وطنی سے نامہ نگار کے مطابق دادفتیانہ کے قریب ٹرالر نے موٹر سائیکل سواروں کو کچل دیا جس کے نتیجہ میں 50 سالہ قاری شرافت اور اسکا 20 سالہ بیٹا اویس موقع پر ہی جاں بحق ہو گئے۔ شیخوپورہ سے نمائندہ نوائے وقت کے مطابق سرگودھا روڈ ماچھکے کے قریب ڈمپر اور موٹر سائیکلوں میں تصادم نتیجہ میں دو افراد موقع پر جاںبحق ہو گئے جبکہ ڈمپر ڈرائیور موقع سے فرار ہو گیا۔موٹر سائیکل سوار جھامکے کے رہائشی بتائے گئے ہیں۔
