لاہور(سپورٹس رپورٹر) شہر میں ہونے والی بارش کے باعث سوموار کے روز کھیلوں کی سرگرمیاں ماند رہیں۔اتوار اور سوموار کی درمیانی شب شہر میں ہونے والی موسلا دھار بارش کے باعث گرائونڈز میں پانی جمع ہوگیا جس کے باعث کرکٹ اور فٹبال کی سرگرمیاں نہ ہوسکیں۔ماڈل ٹائون فٹبال کلب کا تربیتی سیشن دو روز کیلئے ملتوی کر دیا گیا جبکہ ایل سی سی اے کرکٹ گرائونڈ،کرکٹ سنٹر اور اتفاق کرکٹ گرائونڈ میں انٹر ڈسٹرکٹ انڈر نائنٹین کرکٹ ٹورنامنٹ کے میچز کھیلے جانے تھے،دو روزہ میچ کے پہلے دن کا کھیل ممکن نہ ہوسکا،علی گڑھ گرائونڈ اور سٹیگ گرائونڈ میں ترک پلاسٹ ویٹرن کرکٹ گولڈ کپ کے میچز شیڈول تھے لیکن گرائونڈ کھیلنے کے قابل نہ ہونے کے باعث ان میچز کا شیڈول دوبارہ جاری کرنے کا اعلان کیا گیا ہے ۔