کراچی(کرائم رپورٹر) کراچی کے مختلف علاقوں میں فائرنگ کے واقعات میں پاک بحریہ کے ریٹائرڈ افسر اور خاتون سمیت چار افراد زخمی ہوگئے پاک بحریہ کے ریٹائرڈ افسر 65 سالہ کمال کیانی کو نرسری پر لال کوٹھی کے قریب اس وقت فائرنگ کا نشانہ بنایا گیا جب وہ کار میں جارہے تھے۔ انہیں زخمی حالت میں ہسپتال پہنچایا گیا اور طبی امداد کی گئی۔ پولیس کا کہنا ہے کہ ابتدائی طور پر واقعہ ذاتی دشمنی کا نتیجہ معلوم ہوتا ہے۔ ادھر ڈاکس کے علاقے مچھر کالونی میں افغان چوک کے نزدیک نامعلوم افراد کی فائرنگ سے ایک خاتون زخمی ہوگئی جب کہ شاہ لطیف ٹاﺅن کے علاقے خلد آباد میں فائرنگ کر کے دو افراد عدنان پرویز اور بلال عنایت کو زخمی کردیا گیا۔ ادھر لیاری کے علاقے میراناکہ پرحساس اداروںکے اہلکاروں نے ایک اطلاع پر آپریشن کرتے ہوئے گینگ وار کمانڈر کالا پپو عرف ملتانی، ضیاءاور سلیم کے اہم کارندے سمیت 7افراد کو گرفتار کر کے دستی بم، اسلحہ منشیات اوردیگرسامان برآمد کرلیا گیا۔ ذرائع کے مطابق زیرحراست افراد میں مذکورہ لیاری گینگ وار کے کمانڈروںکے اہم شوٹر بھی ہیں۔ کراچی پولیس کے سپیشل انوسٹی گیشن یونٹ نے صدر میں عبداللہ ہارون روڈ پر واقع موبائل مارکیٹ میں چھاپہ مار کر دو دوکانداروں کو گرفتار اور ان کے قبضے سے سمگل شدہ ڈیوائس برآمد کرلی۔
کراچی فائرنگ