شیخوپورہ + ملتان+ لنڈی کوتل (نامہ نگار خصوصی+ خبرنگار خصوصی+ نوائے وقت رپورٹ) سرچ آپریشن کے دوران شیخوپورہ میں 30، لنڈی کوتل میں 6 مشتبہ افراد کو گرفتار کرلیا گیا جبکہ ملتان میں کارروائی کے دوران 2 مبینہ دہشت گردوں کو حراست میں لے لیا گیا۔ شیخوپورہ کے تھانہ فیکٹری ایریا کے علاقہ کوٹ پنڈی داس اور کوٹ عبدالمالک میں ضلع پولیس اور حساس اداروں نے سرچ آپریشن کیا اور30 مشتبہ افراد گرفتار کرکے بھاری مقدار میں اسلحہ برآمد کرکے مشتبہ افراد کو تھانہ فیکٹری ایریا پولیس کے حوالے کردیا گیا ہے۔ ادھر ملتان میں کاؤنٹر ٹیررازم ڈیپارٹمنٹ (سی ٹی ڈی) نے ہیڈ محمد والا کے نزدیک کالعدم تنظیموں سے تعلق رکھنے والے 2 مبینہ دہشت گرد گرفتار کرلئے اور ان سے دستی بم‘ اسلحہ اور اہم عمارتوں کے نقشے برآمد کرلئے۔ سی ٹی ڈی ملتان کو خفیہ اطلاع موصول ہوئی تھی کہ ہیڈ محمد والا کے نزدیک کالعدم تنظیموں تحریک طالبان اور لشکر جھنگوی سے تعلق رکھنے والے 2 مبینہ دہشت گرد موجود ہیں اور وہ جنوبی پنجاب کے مختلف شہروں میں تخریب کاری کا منصوبہ بنا رہے ہیں۔ ادھر ایف سی نے لنڈی کے علاقے سلطان خیل میں سرچ آپریشن کے دوران 6 مشتبہ افراد کو گرفتار کر لیا۔ ایف سی اہلکاروں کی علاقے کا محاصرہ کرکے گھر گھر تلاشی لی گئی۔