پیرس (سپورٹس ڈیسک) ٹینس کی رینکنگ میں امریکی خاتون سپراسٹار سرینا ولیمز دوبارہ عالمی نمبرون کھلاڑی بن گئیں جبکہ مردوںکیسنگلز میں فیڈرر نے کیریئر کا 18واں گرینڈ سلم جیت کر عالمی رینکنگ میں ایک بار پھر ٹاپ 10 میں جگہ بنالی۔ٹینس کی نئی رینکنگ میں امریکی سپراسٹار سرینا ولیمز پیر کو باضابطہ طور پر دوبارہ عالمی نمبرون کھلاڑی بن گئیں، ایک درجے تنزلی پر اینجلیک کیربر کو دوسری پوزیشن پر جانا پڑگیا۔آسٹریلین اوپن کی کوارٹر فائنلسٹ کیرولینا پلسکووا نے 2 درجے ترقی پاکر تیسری پوزیشن لے لی، پری کوارٹر فائنل مرحلے میں کیربر کو مات دینے والی امریکی کھلاڑی کوکو وینڈی ویگ 15 درجے کی چھلانگ لگا کرٹاپ 20 میں شامل ہوگئیں۔ دوسری جانب مردوں کے سنگلز میں فیڈرر نے کیریئر کا 18واں گرینڈ سلم جیت کر عالمی رینکنگ میں ایک بار پھر ٹاپ 10 میں جگہ بنالی، 7 درجے ترقی نے انھیں 10 ویں پوزیشن کا حقدار قرار دے دیا۔رافیل نڈال نے بھی 3 درجے ترقی ملنے پر چھٹی پوزیشن حاصل کرلی، اینڈی مرے بدستور پہلے اور نوواک جوکووچ دوسرے نمبر پر براجمان ہیں، واورنیکا نے میلوس رانک کو پیچھے دھکیل کر تیسری پوزیشن ہتھیالی ۔