گوجرانوالہ + قلعہ دیدار سنگھ (نمائندہ خصوصی) تھپڑ مارنے پر مشتعل بیوی نے فائرنگ کرکے شوہر کو شدید زخمی کر دیا۔ بتایا گیا ہے پیناکھہ کے رہائشی محمد سرور کا اپنی بیوی کلثوم کے ساتھ کسی بات پر جھگڑا ہو گیا۔ اس نے بیوی کو تھپڑ رسید کر دیا جس پر کلثوم نے تھپڑ کا بدلہ لینے کیلئے مبینہ طورپر پسٹل سے شوہر کی ٹانگوں پر گولیاں مار دیں۔ ریسکیو اہلکاروں نے موقع پر پہنچ کر شدید زخمی ہونے والے سرور کو ڈسٹرکٹ ہسپتال منتقل کیا جہاں پر اسے طبی امداد فراہم کی جا رہی ہے۔ دوسری طرف تھانہ لدھیوالہ وڑائچ پولیس نے ملزمہ کلثوم کو حراست میں لے لیا۔ پولیس کے مطابق محمد سرور نجی کمپنی میں ملازم ہے جبکہ اس کی بیوی کا ذہنی توازن درست نہیں لگتا۔