نارووال (نامہ نگار) ٹائروں میں ہوا بھرنے والا کمپریسر پھٹنے سے4بہنوں کا اکلوتا بھائی 17سالہ لڑکا جاں بحق1شدید زخمی ہو گیا جبکہ تیسرا لڑکا معجزانہ طور پر محفوظ رہا۔ تفصیلات کے مطابق نارووال کے بارونق بازار عید گاہ روڈ پر واقع جاوید آٹو سروس پرتین شاگرد کام کرتے تھے۔ حسب معمول شاگردوں نے جن میں راحت،محسن اور کاشف نے دکان کو کھولا اور صفائی میں مصروف ہو گئے اور کمپریسر مشین میں ہوا بھرنے کے لئے اس کو چلا دیا لیکن ٹائم پر بند کرنا بھول گئے۔ ہوا زیادہ بھر جانے سے ٹینکی زور دار دھماکہ سے پھٹ گئی جس کی زد میں آکر مرغی خانے کا رہائشی چار بہنوں کا اکلوتا بھائی 17سالہ راحت موقع پر جاں بحق ہو گیا دوسرا لڑکا محسن جو موضع ڈوگر کا رہائشی تھا شدید زخمی ہوگیا اورتیسرا لڑکا کاشف علی معجزانہ طور پر محفوظ رہا۔ زخمی لڑکے کو ریسکیو1122 ڈی ایچ کیو ہسپتال منتقل کیا جہاں اس کی حالت نازک ہونے پر لاہور ریفر کر دیا۔ پولیس نے دفعہ 322کے تحت مقدمہ درج کرکے مزید تفتیش شروع کردی عید گاہ روڈ کے دکانداروں نے سوگ میں دکانوں کو بند کر دیا۔