لاہور (سپورٹس رپورٹر+نمائندہ سپورٹس) پہلی آل پاکستان ویمن ہاکی لیگ میں لاہور لائنز اور اسلام آباد شاہین نے افتتاحی روز مد مقابل ٹیموں کو شکست دیدی۔ نیشنل ہاکی سٹیڈیم میں کھیلے گئے میچ میں اسلام آباد شاہین کا مقابلہ پشاور بیئرز نے کیا، دونوں ٹیموں کے مابین اچھا مقابلہ ہوا، پہلے ہاف کے اختتام تک کوئی بھی ٹیم گول سکور کرنے میں کامیاب نہ ہوسکی تاہم دوسرے ہاف میں اسلام آباد شاہین کے کھلاڑیوں نے اچھے کھیل کا مظاہرہ کیا اور یکے بعد دیگرے دو گول کر کے اپنی ٹیم کو 2-0 کی برتری دلوائی جو میچ کے اختتام تک برقرار رہی، اسلام آباد شاہین کی جانب سے پہلا گول ماہ جبیں نے سکور کیا جبکہ دوسرا گول اقراء حنیف نے سکور کر کے اپنی ٹیم کی فتح میں کردار ادا کیا۔ دوسرے میچ میں لاہور لائنز نے کراچی ڈولفنز کیخلاف صفر کے مقابلے میں 4 گول سے کامیابی سمیٹی، لاہور لائنز کی جانب سے عشرت نے2 جبکہ امبرین اور نازیہ رحمت نے 1،1 گول سکور کیا،کراچی ڈولفنز کی جانب سے کوئی بھی کھلاڑی گول کرنے میں کامیاب نہ ہو سکی۔