لیہ+ لاہور (آن لائن+ صباح نیوز+ خصوصی رپورٹر) فتح پور کے قریب ٹرک کی سکول وین کو ٹکر سے 7 طالب علموں سمیت 10 افراد جاں بحق اور 11 زخمی ہو گئے۔ریسکیو حکام کے مطابق لیہ میں فتح پور کے قریب ایم ایم عالم روڈ پر دھند کے باعث ٹرک بے قابو ہو کر سکول وین سے ٹکرا گیا جس کے نتیجے میں 7 طالب علم، 2 خواتین اساتذہ اور وین کا ڈرائیور جاں بحق جبکہ 11 بچے زخمی ہو گئے۔امدادی ٹیموں کے اہلکاروں نے حادثے میں زخمی ہونے والے افراد کو طبی امداد کے لئے ڈسٹرکٹ ہیڈ کوارٹر ہسپتال منتقل کردیا جہاں زخمیوں کو طبی امداد دی جا رہی ہے جبکہ شدید زخمیوں کو ملتان منتقل کر دیا گیا ہے۔ وزیر اعلیٰ پنجاب شہباز شریف نے حادثے پر اظہار افسوس کرتے ہوئے متعلقہ حکام سے رپورٹ طلب کرتے ہوئے زخمی طلبا کو بہترین طبی سہولتیں فراہمی کرنے کا حکم دیا ہے ۔ وزیراعلیٰ پنجاب نے حادثہ کے نتیجہ میں جاں بحق طلباء اور دیگر افراد کے لواحقین سے اظہار تعزیت کیا ہے۔جاں بحق ہونیوالے طلبا کی عمریں 10 سے 12 سال کے درمیان تھیں۔