پشاور (آئی این پی+ نوائے وقت نیوز) پشاور موٹر وے ٹول پلازہ سے فرار ہونے والی مشکوک گاڑی میں سوار تین افراد کو گرفتار کرکے اسلحہ برآمد کرلیا گیا۔ ٹول پلازہ موٹر وے پولیس نے ایک گاڑی کو رکنے کا اشارہ کیا جس پر مشکوک گاڑی میں سوار نامعلوم افراد صوابی کی طرف فرار ہو گئے۔ موٹر وے پولیس نے گاڑی نہ روکنے پر گاڑی پر فائرنگ کی اور اس کا تعاقب شروع کر دیا۔ مراتھی انٹرچینج کے قریب گاڑی سے نکل کر ایک شخص نے موٹر وے پولیس پر پستول تان لی۔ اس دوران گاڑی میں سوار دوسرا شخص اور خاتون پشاور کی طرف فرار ہو گئے۔ پولیس نے مشکوک کار کا تعاقب کرکے اسے نوشہرہ میں ولی انٹرچینج کے قریب طورو کے مقام پر پکڑ لیا اور گاڑی میں سوار ایک لڑکی اور دو لڑکوں کو حراست میں لے لیا ۔ڈی پی او نوشہرہ نے بتایا دو لڑکے مجاہد اور خان محمد کا تعلق پشاور کی افغان کالونی اور اتحاد کالونی سے ہے ان سے پستول برآمد کرکے تفتیش شروع کردی گئی ہے۔دونوں نوجوان خاتون دوست کیساتھ گھومنے نکلے تھے۔