فیصل آباد (نمائندہ خصوصی) مدینہ ٹائون کے علاقہ ایڈن ویلی میں زیر زمین گٹر کی صفائی کیلئے اترنے والے 2 مزدور زہریلی گیس سے دم گھٹنے کے باعث جاں بحق ہو گئے‘ نعشیں گھر پہنچنے پر کہرام مچ گیا۔ تفصیلات کے مطابق تھانہ مدینہ ٹائون کے علاقہ کینال روڈ ایڈن ویلی میں خراب سیوریج سسٹم کی بحالی کیلئے کالونی انتظامیہ کی طرف سے بلائے گئے پرائیویٹ مزدور ڈھڈی والا محلہ یوسف آباد کا رہائشی30سالہ یوسف اور 25سالہ ساندل ولد طارق زیر زمین گٹر میں اتر کر صفائی کرنے لگے تو گٹر کی بدبو کے باعث بننے والی زہریلی گیس سے دونوں بے ہوش ہو گئے جنہیں نکال کر تشویشناک حالت میں ہسپتال منتقل کیا جا رہا تھا کہ راستہ میں ہی دم توڑ گئے۔ریسکیو 1122کی امدادی ٹیموں نے نعشیں ہسپتال منتقل کرکے پولیس کو اطلاع دے دی۔ صدر اور مدینہ ٹائون پولیس نے نعشیں قبضہ میں لے کر ضروری کارروائی کے بعد ورثاء کے حوالے کر دیں ۔ گھر سے روزگار کی غرض سے جانیوالوں کی نعشیں گھر پہنچے پر کہرا م مچ گیا اور متوفیان کے بچے نعشوں سے لپٹ کر روتے رہے۔ اس موقع پر رقت آمیز مناظر دیکھنے میں آئے ۔