لاہور(سٹاف رپورٹر + صباح نیوز) لاہور کے علاقے مزنگ میں واقع ایک گھر میں آگ لگنے سے میاں بیوی اور ان کی ایک بچی جاں بحق ہو گئے۔ مزنگ کے علاقے پہلوان چوک میں عمارت کے تیسرے فلور پر واقع فلیٹ میں رات گئے اچانک آگ بھڑک اٹھی جس کے باعث میاں بیوی اور بےٹی جاں بحق ہو گئے جن کی نعشیں نکال کر ہسپتال منتقل کر دی گئی ہیں۔ واقعے کی اطلاع ملتے ہی ریسکیو اہلکار موقع پر پہنچے اور فائر بریگیڈ کو بھی طلب کیا گیا جنہوں نے آگ پر قابو پا لیا۔ تاہم بد قسمتی سے گھر کے تینوں مکین جاں بحق ہو گئے۔ آگ کی زد میں آکر جھلس جانے سے 50 سالہ ثمینہ جاں بحق ہوئی جبکہ اس کا شوہر 58 سالہ زاہد اور 4 سالہ بےٹی عائشہ گہرے دھویں میں دم گھٹنے سے جاں بحق ہوئے۔ فرانزک ٹیموں نے موقع پر پہنچ کر شواہد اکٹھے کر لئے ہیں جبکہ جاں بحق ہونے والوں کی نعشیں مردہ خانے منتقل کر دی گئی ہیں۔ دریں اثناءوزیراعلیٰ شہباز شریف نے مزنگ کے علاقہ میں آتشزدگی کے باعث قیمتی انسانی جانوں کے ضیاع پر گہرے دکھ اور افسوس کا اظہار کیا ہے۔ انہوں نے جاں بحق افراد کے لواحقین سے ہمدردی اور تعزیت کا اظہار کیا ہے۔ وزیراعلیٰ نے انتظامیہ سے رپورٹ طلب کرلی ہے۔
گھر آگ