کراچی (آئی این پی) وزیراعلی سندھ مراد علی شاہ نے 6 ہزارڈاکٹروں کی بھرتی کی منظوری دے دی۔سندھ سیکرٹریٹ کراچی میں وزیراعلیٰ سندھ مراد علی شاہ کی زیرصدارت صوبے میں صحت سے متعلق اجلاس ہوا جس میں وزیرصحت ڈاکٹرسکندرمیندھرو، چیف سیکرٹری سندھ رضوان میمن، ایڈیشنل چیف سیکرٹری محمد وسیم، سیکرٹری خزانہ حسن نقوی اور دیگر اعلیٰ افسران شریک تھے۔ اجلاس کے دوران وزیراعلیٰ سندھ نے ڈاکٹروں کی بھرتی سے متعلق سمری منظورکرلی جس کے تحت پبلک سروس کمشن سے پاس 6 ہزار ڈاکٹرزکو آفرلیٹرجاری کیے جائیں گے، اس کے علاوہ وزیراعلیٰ سندھ نے 337 کنٹریکٹ ڈاکٹرز کو ریگولر کرنے کا بھی حکم دے دیا۔ وزیراعلیٰ نے شہرمیں سینٹرل بلڈ بینک کے قیام کی سکیم پرکام کی سست روی پربرہمی کا اظہارکرتے ہوئے کہا کہ جب تک محکمہ صحت اپنی سکیمزپرجاری کام کی نگرانی نہیں کرے گا کام نہیں ہوگا۔ انہوں نے کہا کہ ہسپتالوں میں ڈاکٹرز نہیں مریض پریشان ہورہے ہیں، ہم نے محکمہ صحت کا بجٹ بڑھایا ہے، اس کا فائدہ عوام تک پہنچنا چاہیئے۔ انہوں نے ملیر، کیماڑی اور اورنگی کے اربن ہیلتھ سینٹرز میں اضافی انڈور بلاکس کا کام جلد مکمل کرنے کی بھی ہدایت کی۔