کراچی (کرائم رپورٹر) کراچی کے مختلف علاقوں میں پر تشدد واقعات میں دو افراد ہلاک اور دو خواتین زخمی ہو گئیں۔ تفصیلات کے مطابق نیو کراچی کے علاقے ایوب گوٹھ کے قریب سندھ سوسائٹی میں نامعلوم افراد نے ایک شخص 50 سالہ دساز علی ولد واحد بخش کو فائرنگ کر کے ہلاک کر دیا۔ مقتول دساز علی کی لاش اس کے گھر سے ملی۔ پولیس کا کہنا ہے کہ مقتول دساز علی درزی تھا اور رات کو گھر میں اکیلا تھا جہاں سے سوتے ہوئے گردن میں گولی مار کر ہلاک کیا گیا۔ فوری طور پر قتل کی وجہ اور قاتلوں کا پتہ نہیں چل سکا ہے اور پولیس اس بارے میں تفتیش کر رہی ہے۔ ادھر سرجانی کے سیکٹر 36-G میں گھریلو جھگڑے کے دوران فائرنگ سے ایک شخص 40 سالہ نواب ولد بشیر ہلاک اور اس کی بیوی 32 سالہ نبیلہ زخمی ہوگئی۔ پولیس کے مطابق فائرنگ میں مقتول نواب عالم کا کزن سمیع اللہ ملوث ہے جس کی تلاش شروع کر دی گئی ہے۔ اس کے علاوہ ڈاکس کے علاقے مچھر کالونی میں ایک خاتون 40 سالہ نوراں بی بی زوجہ ہدایت کو چھری کے وار کرکے زخمی کردیا گیا۔