لاہور(این این آئی) بینظیر بھٹو شہید کی سابق پولیٹیکل سیکرٹری ناہید خان نے کہا ہے کہ نام نہاد قیادت کی غلط پالیسیوں کے باعث آئندہ عام انتخابات میں پیپلز پارٹی کو مزید سکڑتا ہوا دیکھ رہی ہوں، بڑے ناموں کی پارٹی میں شمولیت کیلئے ہاتھ پائوں مارنے کی بجائے اصل طاقت کارکنوں کو منانا ہوگا اور ان کے مطالبے کے مطابق پارٹی کے اندر کڑا احتساب کیا جائے۔ گزشتہ روز خصوصی گفتگو کرتے ہوئے ناہید خان نے کہا کہ پیپلز پارٹی پسے ہوئے طبقات کی آواز تھی لیکن آج عوام کی بدحالی پر صدائے احتجاج بلند کرنے کی بجائے اپنے معاملات سیدھے کئے جارہے ہیں۔ بد قسمتی سے کرپشن کو پیپلز پارٹی کی پہچان بنا دیا گیا ہے جو انتہائی تشویشناک ہے۔ انہوں نے کہا کہ آزاد کشمیر، گلگت بلتستان سمیت چاروں صوبوں کی جماعت غلط پالیسیوں کے باعث سندھ کے چند اضلاع تک محدود ہو گئی ہے۔ کارکن آج بھی اپنا بھرپور کردار ادا کرنے کیلئے تیار ہیں لیکن وہ پیرا شوٹرز کے ساتھ کام نہیں کریں گے۔ انہوں نے کہا کہ مشاورت کے بعد ایک بڑے ورکرز کنونشن کا انعقاد کیا جائے گا۔