فیصل آباد (نمائندہ خصوصی) سرگودھا روڈ نلکہ کوہالہ میں زمین سے نہری کھال گزارنے کے تنازعہ پر چچا زاد بھائیوں 2 متحارب گروپوں میں مسلح تصادم میں دونوں گروپوں کا ایک ایک نوجوان جاں بحق ہو گئے۔ ایک راہگیر زخمی ہوا۔ پولیس کے مطابق تھانہ نشاط آباد کے علاقہ چک نمبر7ج۔ب نلکہ کوہالہ میں محمد اسلم اور ظفر دونوں بھائیوں کی ایک ہی جگہ زمین تھی جس میں سے کھال گزارنے کے تنازعہ پر پہلے بھی ان دونوں خاندانوں کے مابین لڑائی ہو چکی تھی۔ گزشتہ روز اسی وجہ سے ہونے والے جھگڑے میں تیس سالہ فرحان علی ولد اسلم اور دوسرے گروپ کا ملازم جھنگ کا رہائشی 60سالہ جعفر ولد احمد بخش گولیاں لگنے سے جاں بحق ہو گئے جبکہ راہگیر سعید گولیاں لگنے سے زخمی ہو گیا۔ نشاط آباد پولیس نے نعشیں قبضہ میں لے کر پوسٹ مارٹم کے لئے ہسپتال منتقل کر کے کارروائی شروع کر دی ہے۔