کراچی (نیٹ نیوز) کراچی میں فائرنگ اور تشدد کے واقعات میں خاتون سمیت 4 افراد قتل ہو گئے جبکہ شاہ لطیف ٹاؤن سے تین ڈاکوؤں کو گرفتار کرلیا گیا۔ تفصیلات کے مطابق ہاکس بے کے قریب نالے سے دو افراد کی تشدد زدہ نعشیں برآمد ہوئیں جنکی شناخت نہ ہو سکی۔ گلستان جوہر میں گھریلو تنازع پر ملزم فیضان بنگش نے فائرنگ کرکے بھائی کو قتل کر دیا۔ گولی لگنے سے اس کا سوتیلا باپ بھی زخمی ہو گیا جسے ہسپتال منتقل کر دیا گیا۔ ادھر شاہ لطیف ٹاؤن میں پولیس مقابلے کے دوران تین ڈاکو گرفتار کرلئے گئے۔ ملزم بابر، ایاز، قدیر سٹریٹ کرائم کی وارداتوں میں ملوث ہیں۔ ان سے اسلحہ برآمد کرلیا گیا۔ دوسری جانب ملیر الفلاح کے علاقے میں لوٹ مار کرنے والا ڈاکو شہریوں نے دھر لیا اور تشدد کا نشانہ بنانے کے بعد پولیس کے حوالے کر دیا۔ پولیس کے مطابق ملزم کا ایک ساتھی فرار ہوگیا۔ دوسری طرف خواجہ اجمیر نگر میں معمر شخص نے 19 سالہ بیوی کو شادی کے 8 ماہ بعد ہی تشدد کرکے مار ڈالا۔ پولیس نے ملزم کو گرفتار کر لیا۔ علاوہ ازیں اورنگی ٹائون پولیس نے قطر ہسپتال سے اغواء ہونے والے نومولود بچے کو بازیاب اور خواتین سمیت اغواء کار گروہ کے 9 افراد کو گرفتار کرلیا۔ بچے کی بازیابی اور گروہ میں شامل ملزمان کی گرفتاری بچے کو اغوا کرنے والی برقعہ پوش عورت مسرت کی نشاندہی پر سراب گوٹھ میں افغان بستی سے عمل میں آئی ملزمہ مسرت نے ایک روز قبل ہسپتال سے نومولود بچے کو اغواء کرکے سہراب گوٹھ کی افغان بستی میں اپنے گروہ کے حوالے کیا تھا اور بچے کو ایک لاکھ 35 ہزار روپے کے عوض ایک جوڑے کو فروخت کیا جا رہا تھا‘ گرفتار شدگان میں بچے کو خریدنے والے میاں بیوی بھی شامل ہیں۔