لاہور(این این آئی+نوائے وقت رپورٹ) وفاقی وزیر ریلویز خواجہ سعد رفیق نے کہا ہے کہ دوسروں پر کمشن لینے کا الزام لگانے سے پہلے زرداری صاحب آئینہ دیکھ لیا کریں، لوٹ مار کے نِت نئے طریقے ایجاد کرنا آصف زرداری کا طرہ امتیاز ہے، قوم چوری کی چوری کھا کر جوان ہونے والوں کو پاکستان لوٹنے کا موقع نہیں دے گی۔ اپنے ایک بیان میں خواجہ سعد رفیق نے کہا کہ آصف زرداری پارٹی کے دس سالہ دور اقتدار نے سندھ کو آسیب زدہ کھنڈر بنا ڈالا ہے۔ سندھ کی ترجمانی کی دعویدار زرداری پارٹی نے سندھ کو مایوسی کے سوا کچھ نہیں دیا۔ مسلم لیگ (ن) اہل سندھ کو زرداریوں کی استحصالی حکومت سے نجات دلائے گی، انشاءاللہ سندھ میں سیاسی خلاءمسلم لیگ (ن) ہی پورا کرے گی۔ خوشحالی کیلئے 2018 کے انتخابات میں پیپلز پارٹی کی شکست لازم ہے۔ متبادل قیادت ملی تو اہل سندھ 2018 ءکے انتخابات میں پیپلز پارٹی کا سندھ کارڈ ان سے چھین لیں گے۔
سعد رفیق