کراچی(کرائم رپورٹر) سی ٹی ڈی پولیس کی منگھوپیر کے علاقے نیو میانوالی کالونی میں کارورائی کالعدم تحریک طالبان سے تعلق رکھنے والے ایک دہشت گرد کوگرفتار کرکے اسلحہ اور دستی بم برآمد کرلیا۔ پولیس کے مطابق دہشت گرد نور الدین مگسی کا تعلق عابد مچھڑ گروپ سے ہے اور وہ ٹارگٹ کلنگ کی ایک درجن سے زائد وارداتوں کے علاوہ دہشت گردی کے دیگر واقعات میں بھی ملوث ہے۔ دریں اثناء ملزم چھوڑنے کے عوض رشوت کی وصولی کیلئے آنیوالے کو رینجرز نے پکڑ لیا۔ بہادرآباد پولیس نے معین نامی شخص کو گرفتار اور پانچ لاکھ روپے لیکر رہا کیا تھا جبکہ مزید پندرہ لاکھ روپے کا مطالبہ کیا تھا۔ رینجرز ذرائع کے مطابق پندرہ لاکھ روپے کی وصولی کے لئے آنے والے شخص نے گرفتاری کے بعد بتایا ہے کہ وصول کی گئی پانچ لاکھ روپے کی رقم میں سے 20 ہزار اسے ملے تھے۔ ذرائع کا کہنا ہے کہ گرفتار شخص کے بیان پر بہادر آباد پولیس کے ملوث افسر کے خلاف بھی کارروائی شروع کر دی گئی ہے۔