نوشہرہ (صباح نیوز) نوشہرہ میںبدبخت شخص نے فائرنگ کر کے اپنے باپ ، بھائی اور دو بھتیجوں کو قتل کر دیا ۔ پولیس کے مطابق فائرنگ کا واقعہ اکبر پورہ کے علاقہ بالو میں پیش آیا ۔ تفصیلات کے مطابق ظہور نامی شخص نے اپنے والد اطلس خان ، اپنے بھائی فقیر حسین اور دو کمسن بھتیجوں کو رات گئے فائرنگ کر کے قتل کر دیا ۔ ملزم فائرنگ کے بعد فرار ہو گیا تاہم اطلاع ملنے پر پولیس نے ملزم کو اس کے سسر کے گھر سے گرفتار کرکے آلہ قتل کلاشنکوف بھی برآمد کر لی ۔ ملزم نے پولیس کو بتایا کہ وہ کئی جرائم میں پولیس کو مطلوب تھا اور اس کو رقم کی اشد ضرورت تھی اس نے اپنے والد اور بھائی کو کہا تھا کہ گھر فروخت کر کے اسے رقم فراہم کریں تاہم نہ کسی نے گھر بیچا اور نہ اسے رقم فراہم کی ۔ جس پر دلبرداشتہ ہو کر اس نے فائرنگ کر کے اپنے باپ ، بھائی اور بھتیجوں کو قتل کر دیا۔ پولیس نے پوسٹ مارٹم کے بعد نعشیں ورثاء کے حوالے کر دیں۔