پیانگ یانگ (بی بی سی ڈاٹ کام) شمالی کوریا کے سرکاری میڈیا نے کہا ہے کہ امریکہ اور جنوبی کوریا کے خفیہ اہلکار شمالی کوریا کے رہنما کم جونگ ان کو ہلاک کرنے کی سازش کر رہے ہیں۔ شمالی کوریا کی وزارتِ ملکی سلامتی کی طرف سے جاری ایک بیان میں کہا گیا ہے ایک دہشت گرد گروہ جسے امریکی خفیہ ادارے سی آئی اے اور جنوبی کوریا کے خفیہ ادارے کی پشت پناہی حاصل ہے وہ ملک میں داخل ہو گیا ہے اور ایک کیمیائی مادے سے حملہ کرنے کا منصوبہ رکھتا ہے۔ بیان میں کہا گیا کہ اس دہشت گرد گروہ کو جلد پکڑ لیا جائے گا اور انھیں بے رحمی سے کیفر کردار تک پہنچا دیا جائے گا۔ یہ انکشاف ایک ایسے موقع پر کیا گیا جب امریکہ اور شمالی کوریا میں کشیدگی انتہائی درجے پر ہے۔ شمالی کوریا کی سرکاری نیوز ایجنسی سے جاری ہونے والے اس بیان میں مزید کہا گیا کہ دہشت گرد گروہ مبینہ طور پر کیمیائی اور تابکاری مادے کے علاوہ نینو زہریلا مادہ بھی استعمال کرنے کا ارادہ رکھتا ہے۔ شمالی کوریا جو چھٹا جوہری تجربہ کرنے کی دھمکیاں دے رہے اس کے ساتھ آجکل امریکہ کی شدید لفظی جنگ چل رہی ہے۔