لاہور (خبرنگار) ق لیگ فیصل آباد کے صدر خالد پرویز گل نے بلاول ہائوس میں سابق صدر اور شریک چیئرمین آصف علی زرداری سے ملاقات کرکے پیپلزپارٹی میں شمولیت اختیار کرلی۔ پی پی 61 فیصل آباد سے صوبائی اسمبلی کیلئے امیدوار چودھری خالد پرویز گل آصف علی زرداری اور بلاول بھٹو کی قیادت پر مکمل اعتماد کا اظہار کرتے ہوئے پیپلزپارٹی میں شامل ہوئے۔ اس موقع پر آصف زرداری نے کہا حکمرانوں کا وقت رخصت اب آ چکا ہے۔ ان کو اب سامان سمیٹ کر وزیراعظم ہائوس سے رخصت بھی ہونا پڑے گا۔ آنیوالے انتخابات میں عوام نہ صرف لاہور بلکہ پنجاب بھر میں ان کا بوریا بستر گول کر دیں گے۔ انہوں نے کہا حکمرانوں نے لوڈشیڈنگ‘ بے روزگاری‘ مہنگائی کے خاتمے کا نعرہ لگایا اور تینوں ہی مسئلے اب پہلے سے کئی گنا بڑھ گئے ہیں اور عوام کا خون چوس رہے ہیں۔ انہوں نے کہا عوام ان سے اتنا تنگ آ گئی ہے وہ فوری خاتمہ چاہتی ہے۔نوائے وقت رپورٹ کے مطابق بزنس کمیونٹی کے عشائیہ سے خطاب کرتے ہوئے آصف علی زرداری نے کہا کہ حکمران قرض پر قرض لیکر معیشت چلا رہے ہیں حکمرانوں نے لوڈ شیڈنگ ختم کرنے کے جھوٹے وعدے کئے ہمارے احتجاج سے حکومت بوکھلاہٹ کا شکار ہے۔ انہوں نے کہا کہ ہم صنعتوں کو گیس دیں گے عوام پر ٹیکسز کا بوجھ ختم کریں گے پنجاب میں بند ہونے والی صنعتوں کو کھولیں گے صنعت کار حکومت پالیسیوں کو اپنائیں نہیں اپنی پالیسیاں بنائیں صنعت کاروں کے مسائل حل کریں گے۔