فیروزہ (صباح نیوز) آوارہ کتوں کے حملے میں چوتھی جماعت کا طالب علم جاں بحق ہو گیا ہے۔ تفصیل کے مطابق بستی شہیدآباد میں جام عقیل احمد کا بارہ سالہ بیٹا محمد حسین جو کہ گورنمنٹ بوائز ہائر سیکنڈری سکول فیروزہ میں چوتھی جماعت کا طالب علم تھا دیگر تین ساتھیوں کے ہمراہ کھیل رہا تھا کہ آوارہ کتوں پر مشتمل گروہ نے بھاگتے ہوئے دبوچ لیا جبکہ اس کے دیگر ساتھی ریلوے لائن عبورکر کے جان بچانے میں کامیاب ہو گئے۔ کتوں کے کاٹنے سے محمد حسین موقع پر ہی جاں بحق ہو گیا، پولیس اور عوام نے تعاقب کر کے دو کتوں کو گولی مار کر مار ڈالا، اس المناک واقعہ کے رونما ہونے پر علاقہ بھر میں سوگ اور خوف کی کیفیت ہے۔ اہل علاقہ اور ورثا نے شدید احتجاج کیا۔ واضح رہے کہ فیروزہ میں آوارہ کتوں کے کاٹنے کا یہ دو ماہ میں چوتھا واقعہ ہے، اس سے قبل تین حقیقی معصوم بھائیوں سمیت چک نمبر124این پی کی بشریٰ بی بی بھی آوارہ کتوں کے کاٹنے سے جاں بحق ہو چکے ہیں۔