لاہور (خصوصی نامہ نگار) پاکستان عوامی تحریک کے قائد ڈاکٹر محمد طاہرالقادری نے کہا ہے کہ حکومت کا اگلا ہدف کلبھوشن کی بھارت کو باعزت حوالگی ہے، جہاں قانون کی بجائے افراد بالادست ہوں وہاں قومی سلامتی کو بھی انصاف نہیں ملتا، کب تک پاکستان کا مفاد افراد کی ضرورتوں اور مصلحتوں کی سولی چڑھتا رہے گا۔ نیوز لیکس کا ڈراپ سین آخری سین نہیں ابھی بہت کچھ ہونا باقی ہے، نواز شریف اقتدار میں آئے نہیں بلکہ لائے گئے ہیں، قانون کا جنازہ 17 جون 2014 ء کے دن اٹھ گیا تھا جب ریاست نے اپنے 100 شہریوں کو گولیاں سے چھلنی کیا اور پھر ایف آئی آر بھی درج نہ ہونے دی، اب میڈیا اور ’’گستاخ‘‘ اینکرز اور صحافیوں کے خلاف بڑا کریک ڈائون ہو گا، جس ملزم حکومت سے جواب مانگا گیا تھا اس نے الٹا جواب طلبی کرڈا لی، سیٹلمنٹ کی خبر منظر عام پرآنے کے بعد مشرقی یا مغربی بارڈر پر ایک گولی چلنے کی آواز نہیں سنی گئی، گزشتہ روز انہوں نے عوامی تحریک کی سنٹرل کور کمیٹی کے ممبران سے ٹیلیفونک گفتگو کرتے ہوئے کہا کہ ذمہ داروں کو جواب دینا چاہیے کہ اگر کوئی مسئلہ نہیں تھا تو کئی ماہ تک نیو زلیکس انکوائری رپورٹ پردہ راز میں کیوں رہی اور اسے مسترد کرنے کی ضرورت پیش کیوں آئی؟ قومی سلامتی کے اداروں پر حملوں کی یہ ابتدا ہے ،یہ سلسلہ یہاں نہیں رکے گا ،دیکھتے ہیں کہ اداروں میں لچک اور کتنا صبر ہے۔ سانحہ ماڈل ٹائون جوڈیشل کمشن کی رپورٹ مرتب کرنیوالے غیور جج نے رد و بدل سے انکار کر دیا جس کی وجہ سے رپورٹ منظر عام پر نہیں لائی جا رہی۔