مردان (صباح نیوز + این این آئی) مشال قتل کیس میں مزید چار ملزموں کو گرفتار کرلیا گیا ہے۔ پولیس کے مطابق گرفتار ملزموں میں شہاب علی، صہیب، سعید اور شہزاد شامل ہیں۔ ان گرفتاریوں کے بعد مشال قتل کیس میں گرفتار ملزموں کی تعداد 53 ہوگئی ہے۔2 کی شناخت وڈیو سے ہوئی جبکہ دو کو دیگر ملزموں کی نشاندہی پر گرفتار کیا گیا۔ پولیس کا کہنا ہے کہ ایک ملزم عارف روپوش ہے جبکہ 49 جیل میں ہیں۔ سپریم کورٹ کے ازخود نوٹس پرپولیس مشال قتل کی رپورٹ 13 مئی کو دیگی۔ عوامی نیشنل پارٹی کے ترجمان زاہد خان نے ایک بیان میں کہاکہ اشتعال انگیز تقریر کرنے والے پی ٹی آئی کے تحصیل ممبرعارف خان کو پولیس نے حراست میں لیا تھا تاہم بعد میں اسے جیل سے فرار کروادیا گیا۔انہوں نے کہا کہ تبدیلی خان کے ملازم وزیراعلیٰ کا خیبر پی کے کی غیرسیاسی پولیس پردبائوہے۔ زاہد خان نے کہا کہ مشال خان قتل کے گواہ علی نواز پر قاتلانہ حملہ ہوا، لیکن پولیس صوبائی حکومت کی پشت پناہی کے باعث حملے کو حادثہ قراردے رہی ہے۔ تفتیش کیلئے جے آئی ٹی بنائی جائے۔