لاہور(سپورٹس ڈیسک ) پاکستان نے ویسٹ انڈیز کو سیریز کے تیسرے اور فیصلہ کن ٹیسٹ میچ میں101رنز سے شکست دے کر پہلی بار کیریبیئن سر زمین پر ٹیسٹ سیریز جیت لی ۔ 304رنز کے تعاقب میں میزبان ٹیم 202رنز پر پویلین لوٹ گئی ۔ کریگ براتھویٹ 6‘کیرون پاول چار ‘شمرون ہٹمیئر 25‘شائی ہوپ سترہ ‘وشال سنگھ دو ‘ڈائورچ دو ‘جیس ہولڈر بائیس ‘بشو تین‘جوزف پانچ رنز بناکر آئوٹ ہوئے ‘روسٹن چیز101رنز پر ناقابل شکست رہے ۔یاسر شاہ نے پانچ کھلاڑیوں کو آئوٹ کیا۔پاکستان نے دوسری اننگز 174رنز آٹھ کھلاڑی آئوٹ پر ڈکلیئر کر کے کالی آندھی کو جیت کیلئے 304رنز کا ہدف دیا تھا ۔ پاکستان کی طرف سے یونس خان 35اور یاسر شاہ ناقابل شکست 38رنز بناکر نمایاں رہے ۔ جوزف نے تین کھلاڑیوں کو آئوٹ کیا ۔پاکستان نے پہلی اننگز میں 376اور ویسٹ انڈیز نے پہلی اننگز میں 247رنز بنائے تھے ۔مصباح الحق اور یونس خان کے کیر یئر کی یہ آخری ٹیسٹ سیریز تھی ، وہ ریٹائرمنٹ کا اعلان پہلے ہی کر چکے ہیں ۔