لاہور (این این آئی) پیپلز پارٹی کے مرکزی رہنما سینیٹر اعتزاز احسن نے کہا ہے کہ موجودہ حکومت کی مصنوعی کامیابیاں آئندہ عام انتخابات میں خس و خاشاک کی طرح بہہ جائیں گی، ہر معاملے پر مٹی پائو کا فارمولہ کامیاب نہیں ہوسکتا بلکہ حکمرانوں کی زبردست پکڑ کے آثار نمایاں ہیں، پیپلز پارٹی کی قیادت کے متحرک ہونے سے مسلم لیگ (ن) والوں کو بخار چڑھ گیا ہے۔ انہوں نے کہا کہ وزیر اعظم نواز شریف اور انکے بھائی وزیر اعلیٰ شہباز شریف ہر ہفتے بجلی پیدا کرنے کے منصوبے کا فیتہ کاٹتے ہیں لیکن پھر بھی حیرت ہے کہ لوڈ شیڈنگ کم ہونے کی بجائے بڑھ رہی ہے۔ پیپلزپارٹی کی قیادت نے حکمرانو ں کو بے نقاب کرنے کا فیصلہ کرلیا ہے۔ وزیراعظم کہتے ہیں کہ میں پانچ سالوں کا حساب دوں گا لیکن ہم کہتے ہیں کہ عوام آپ سے حساب نہیں بلکہ لوٹ مارپر آپ کا احتساب کریں گے۔