لاہور(نمائندہ سپورٹس+ سپورٹس رپورٹر )قومی ٹیم کے ہیڈ کوچ مکی آرتھر نے کہا ہے کہ یونس خان اور مصباح الحق کی ریٹائرمنٹ کے بعد ایک خلا پیدا ہو گا اور یہ نوجوانوں کے پاس نادر موقع ہے کہ وہ اس موقع سے فائدہ اٹھاتے ان دو کھلاڑیوں کا خلا پر کریں۔ ہمیں آگے بڑھنا ہے اور نوجوانوں کو یہ دیکھنا چاہیے کہ ٹیم میں دو کھلاڑیوں کی جگہ خالی ہے۔ امید ہے مصباح اور یونس کے بعد نوجوان فائدہ اٹھاتے ہوئے ان کا خلا پر کرنے کی کوشش کریں گے۔ چند نئے کھلاڑیوں نے عمدہ کارکردگی سے صلاحیتوں کا لوہا منوایا۔ محمد عباس کی سیریز شاندار رہی، شاداب اور حسن علی نے بھی ٹیسٹ ڈیبیو کیا۔ ہمارے پاس متعدد نئے باصلاحیت کھلاڑی سامنے آئے ہیں جو پاکستان کرکٹ کیلئے خوش آئند امر ہے، ہمارے پاس بیٹنگ لائن میں دو جگہیں خالی ہیں اور اب یہ نوجوانوں پر ہے کہ وہ سامنے آئیں اور بہترین کارکردگی کا مظاہرہ کرتے ہوئے اس خلا کو پر کر دیں۔ون ڈے ٹیم کے بارے میں کہا کہ پاکستان نے ون ڈے میں بہت سخت محنت کی اور ویسٹ انڈیز کیخلاف سیریز میں جدید دور کی کرکٹ کھیلی۔ ہم نے اس طرز کی کرکٹ کھیلی جو میں اس ٹیم سے چاہتا تھا۔ ہم ڈاٹ گیندوں اور یارکرز سمیت ان تمام چیزوں پر کام کیا جو ہمارے لیے چیمپیئنز ٹرافی میں انتہائی اہمیت کی حامل ہوں گی۔