لاہور(سپورٹس رپورٹر + نمائندہ سپورٹس) پانچویں چیف منسٹر ویمن گولڈ کپ ہاکی ٹورنامنٹ کا فائنل آج پنجاب وائٹس اور یونائٹیڈ ویمن ہاکی اکیڈمی کی ٹیموں کے درمیان کھیلا جائیگا۔ تیسری اور چوتھی پوزیشن کے لئے پنجاب کلر اور اسلام آباد جبکہ پانچویں اور چھٹی پوزیشن کے لئے خیبر پی کے اور سندھ کی ٹیمیں مد مقابل ہونگی۔ نیشنل ہاکی ۔سٹیڈیم میں جاری ٹورنامنٹ میں گزشتہ روز آخری پول میچز کھیلے گئے جس میں پنجاب وائیٹس نے پنجاب کلر ٹیم کو چھ صفر سے مات دی۔ فاتح ٹیم کی جانب سے عشرت عباس نے پانچ جبکہ اریبہ نے ایک گول سکور کیا۔ دوسرے میچ میں یونائیٹڈ ویمن ہاکی اکیڈمی نے سندھ کو آٹھ صفر سے زیر کیا۔ ٹیسٹ کرکٹر احسان عادل کی بہن افشیں نورین نے تین جبکہ سدرہ حکیم اور اقرا جاوید نے دو دو اور صوبیہ ادریس نے ایک گول سکور کیا۔ تیسرے میچ میں اسلام آباد نے بلوچستان کے خلاف چھ صفر سے کامیابی سمیٹی۔ عائشہ رفیق نے ہیٹ ٹرک، ساحل ملک نے دو جبکہ حنا عروج نے ایک گول سکور کیا۔