وہاڑی (نامہ نگار) نواحی علاقہ چک 47بنگلہ فاضل میں دوسری شادی کی رنجش میں پہلی بیوی نے خاوند پر تیزاب پھینک دیا جس سے وہ بری طرح جھلس گیا ،بیوی موقع سے فرار ہو گئی۔ خاوند عمران اشرف کے بیان پر پولیس تھانہ لڈن نے ملزمہ یاسمین کے خلاف زیر دفعہ 336/Bاور دہشت گردی کی دفعہ کے تحت مقدمہ درج کر لیا ۔ ایس ایچ او تھانہ لڈن نے بتایا کہ ملزمہ کی گرفتاری کیلئے چھاپے مارے جا رہے ہیں،ابھی تک گرفتاری عمل میں نہیں آئی۔یاسمین سے عمران اشرف نے پندرہ سال قبل شادی کی تھی۔ اڑڑھائی سال سے دونوں میں تعلقات کشیدہ تھے۔ عمران اشرف نے دوسال قبل عاصمہ صفدر نامی خاتون سے دوسری شادی کر لی جس کا یاسمین کو رنج تھا۔ یہ بات قابل ذکر ہے کہ یاسمین نے عمران اشرف کے ساتھ شادی سے پہلے دو خاوندوں سے طلاق لیکر تیسرا نکاح عمران اشرف سے کیا تھا ۔ کچھ عرصہ قبل تعلقات ٹھیک ہونے کے بعد عمران اشرف اپنی پہلی بیوی یا سمین کے پاس بنگلہ فاضل آیا ہوا تھا جہاں رات کو سوتے میں یاسمین نے بالٹی میں بھرا ہوا تیزاب اس پر پھینک دیا جس سے عمران اشرف بری طرح جھلس گیا۔ مضروب عمران اشرف کو ڈی ایچ کیو ہسپتال وہاڑی لایا گیا تو ڈاکٹروں نے ابتدائی طبی امداد دینے کے بعد حالت تشویشناک ہونے کے باعث نشتر ہسپتال ملتان ریفر کر دیا۔