لاہور (نامہ نگار) سی آئی اے غازی آباد پولیس نے بابربٹ قتل کیس کے مرکزی ملزم شعیب بٹ اور شانی جٹ کو گرفتارکرلیا ہے۔ بابربٹ قتل کیس میں اہم پیشرفت ہوئی ہے۔ مرکزی ملزم شعیب بٹ اور اسکے ساتھی شانی جٹ کو گرفتارکرلیا گیا۔ ذرائع کے مطابق بابر بٹ کو قتل کرنے کا پلان شعیب بٹ نے بنایا تھا۔ بابر بٹ پر گھر میں گھس کر فائرنگ کرنے والے شانی جٹ اور ملک گھگا تھے۔ پہلے سے گرفتار ملزمان عاطف جٹ اور سونی بٹ نے دوران تفتیش انکشاف کیا تھا کہ بابر بٹ کو قتل کرنے کی پلاننگ شعیب بٹ نے کی۔ انہیں نہیں معلوم پیپلز پارٹی کے رہنما کو قتل کرانے کا کس کو فائدہ ہوا ہے۔ گزشتہ روز سی آئی اے پولیس نے پلاننگ کرنے والے شعیب بٹ اور شوٹر شانی جٹ کو گرفتار کرلیا جبکہ شوٹر ملک گھگا کو تاحال گرفتار نہیں کیا جاسکا۔ یاد رہے کہ بابر بٹ قتل کیس میں مسلم لیگی ایم این اے سہیل شوکت بٹ بھی نامزد ملزم ہیں۔