ٹنڈو الٰہ یار (نیٹ نیوز) سندھ کے ضلع ٹنڈو الہٰیار میں پانچ بچوں کی ماں کو اسکے شوہر نے کلہاڑی کے وار سے قتل کردیا۔ تھانہ میثان کے ایس ایچ او شہاب الدین عْمرانی نے بتایا کہ 32 سالہ مایا بھیل کو اس کے شوہر پریتم بھیل نے اس وقت کلہاڑی کے وار سے قتل کیا جب وہ کھیت میں کام کر رہی تھی۔ انہوں نے کہا کہ مقتولہ کے بھائی کیوَل بھیل نے ملزم پریتم کے خلاف مقدمہ درج کرایا، جس میں کہا گیا کہ ان کی بہن کو اس کے شوہر نے بغیر کسی وجہ کے بیدردی سے قتل کیا۔ مقتولہ کی نعش سول ہسپتال میں پوسٹ مارٹم کے بعد ان کے ورثا کے حوالے کردی گئی۔ ایس ایچ او کے مطابق ملزم گاؤں سے فرار ہوگیا ہے جس کی گرفتاری کے لیے چھاپے مار رہے ہیں۔