لاہور (آئی این پی) عوامی مسلم لیگ کے سربراہ شیخ رشید احمد نے معافی نہ مانگنے تک امریکی سفارتکاروں سے ملاقات سے انکار کر دیا۔ اپنے ایک انٹرویو کے دوران شیخ رشید نے بتایا کہ میری ایک تقریب میں امریکی سفارتکاروں سے ہیلو ہیلو ہوئی جہاں مجھے ان کی خواہش نظر آئی ہے کہ وہ مجھ سے ملاقات کرنا چاہتے ہیں مگر میں نے ان پر واضح کر دیا ہے جب تک آپ مجھے جہاز سے آف لوڈ کرنے کے معاملے پر معافی نہیں مانگیں گے میں آپ سے ملاقات نہیں کر سکتا۔ دریں اثنا نیشنل پریس کلب کے زیراہتمام راولپنڈی کیمپ آفس میں منعقدہ فیملی افطار ڈنر میں شرکت کے بعد میڈیا سے گفتگو کرتے ہوئے کہا کہ جے آئی ٹی اپنا کام کر رہی ہے۔ اگر فیصلہ 60 دن سے قبل بھی آتا ہے تو دیدینا چاہئے۔ نہال ہاشمی کی کوئی حیثیت نہیں۔ نوازشریف نے انہیں اسی کام کیلئے رکھا ہوا ہے۔ شیخ رشید نے کہا کہ یہ جو کالا کیمرہ ہے انقلاب کی نشانی ہے۔ میڈیا نے ہمیشہ اہم کردار ادا کیا ہے۔ مہمان خصوصی دربار حضرت سخی سلطان باہو کے سجادہ نشین الحاج پیر سلطان فیاض الحسن نے کہا کہ دنیا میں وہی لوگ کامیاب ہوتے ہیں جو نہ صرف اسلام میں دیئے گئے ضابطہ حیات کے مطابق زندگی گزارتے ہیں بلکہ اللہ کی مخلوق کو راضی کرنے میں اپنا آپ بھی قربان کر دیتے ہیں۔