گجرات ، گوجرانوالہ ( نامہ نگار + نمائندہ خصوصی)گجرات اور گوجرانوالہ میں سی ٹی ڈی کی کارروائیوں میں تین دہشت گرد گرفتار کرلئے گئے جن میں سے ایک کا تعلق داعش سے بتایا جاتا ہے۔ گجرات میں سی ٹی ڈی گوجرانوالہ نے مخبرکی اطلاع پر سٹیٹ لائف کی بلڈنگ کے قریب ریڈ کر کے داعش سے تعلق رکھنے والے دہشت گردسفیان کو حراست میں لیکر نامعلوم مقام پر منتقل کردیا اور دہشت گرد کے قبضے سے ڈیٹونیٹر، ایک کلو سے زائد بارودی مواد اور دیگر آلات برآمد کرکے مزید پوچھ گچھ شروع کر دی۔ ابتدائی مرحلے میں گرفتار دہشت گرد نے گجرات کی اہم تنصیبات کو نشانہ بنانے کا پروگرام بنا رکھا تھا۔ علاوہ ازیں گوجرانوالہ میں سی ٹی ڈی نے دو مبینہ دہشت گردوں کو حراست میں لیکر انکے قبضہ سے بھاری مقدار میں دھماکہ خیز امواد برآمد کرلیا۔ بتایا گیا ہے کہ سی ٹی ڈی نے پرانی چونگی پسرور روڈ پر چھاپہ مار کاروائی کے دوران دومبینہ دہشت گردوں فیاض اور نصرت کو حراست میں لے لیا۔حراست میں لئے جانیوالے مبینہ دہشت گرد فیاض کا تعلق بوریوالا اور نصرت کا مظفر گڑھ سے بیان کیا گیا ہے جن سے تفتیش جاری ہے۔