جے آئی ٹی قطری شہزادے سے ان کے محل میں جا کر تحقیقات کر لے وہ جوابات دینے کے لئے تیار ہیں: سیف الرحمان
اسلام آباد (آن لائن) سابق چیئر مین قومی احتساب بیورو (نیب) و سینیٹر سیف الرحمان نے کہا ہے کہ ان کی قطری حکام سے ذاتی طور پر بات ہوئی ہے جس میں انہوں نے کہا ہے کہ تحقیقات کے لئے مشترکہ تحقیقاتی ٹیم قطر آنا چاہے تو وہ ان کے سوالات کے جواب دینے کے لئے تیار ہیں، قطری حکام نے جے آئی ٹی کے سوالات کے جواب دیئے ہیں اور یہ بھی کہا ہے کہ اگر جے آئی ٹی مزید سوالات کرنا چاہے تو وہ جواب دینے کے لئے تیار ہیں۔ نجی ٹی وی چینل کے پروگرام میں گفتگو کرتے ہوئے سابق چیئر مین قومی احتساب بیورو سیف الرحمان نے کہا ، قطری شاہی خاندان کے میاں نواز شریف کے ساتھ خصوصی تعلقات قائم ہیں۔
