قصور ، فیصل آباد (نمائندہ نوائے وقت+ نمائندہ خصوصی) قصور اور فیصل آباد میں ٹریفک حادثات میں چچا، بھتیجے سمیت 4 افراد جاں بحق جبکہ 3 زخمی ہوگئے۔ قصور میں دیپالپور روڈ ٹریٹمنٹ پلانٹ کے قریب موٹر سائیکل اور پک اپ ٹکر سے سرحدی گائوں وہیگل کے عبدالطیف اور اسکا 7 سالہ بھتیجا جنید موقع پر ہی جاں بحق ہوگئے جبکہ تین افراد زخمی ہوگئے۔ پولیس کے مطابق جاں بحق افراد کے ورثا اور زخمیوں نے پولیس کارروائی سے انکار کردیا۔ مزید برآں فیصل آباد میں نشاط آباد کے علاقہ بوڑے وال کے قریب گزشتہ روز 2 تیز رفتار موٹر سائیکلیں آپس میں ٹکرا گئیں جس کے نتیجے میں چک 7 ج ب کا رہائشی 30 سالہ علی حسن اور چک 257 ج کا 20 سالہ قمر موقع پر دم توڑ گئے۔