فلوریڈا (سپورٹس ڈیسک) امریکی ٹینس سٹار وینس ولیمز کی گاڑی کی ٹکر سے ایک 78 سالہ شخص کی موت واقع ہو گئی ہے۔ یہ واقعہ گزشتہ ماہ 9 جون کو فلوریڈا میں پیش آیا تاہم ابھی تک واقعے کی تحقیقات کی جا رہی ہیں۔ حادثے کے بعد جیروم بارسن نامی اس شخص کو ہسپتال داخل کرایا گیا تاہم وہ زخموں کی تاب نہ لاتے ہوئے دو ہفتے بعد دم توڑ گیا۔ اطلاعات ہیں کہ ابتدائی تفتیش میں پولیس نے وینس ولیمز کو قصوروار قرار دیتے ہوئے کہا ہے کہ حادثہ ان کی غلطی کی وجہ سے پیش آیا، لیکن ابھی تک انھیں ٹریفک قوانین کی خلاف ورزی کا کوئی ٹوٹس جاری نہیں کیا گیا۔غیر ملکی خبر رساں ادارے کے مطابق 78 سالہ جیروم بارسن اپنی اہلیہ کے ساتھ گاڑی میں سفر کر رہے تھے کہ اچانک ایک سگنل کراسنگ پر ان کی گاڑی کی وینس ولیمز کی گاڑی کے ساتھ ٹکر ہو گئی۔ عینی شاہدین کے مطابق اس وقت ٹریفک جام تھا جس کی وجہ سے وینس ولیمز کی گاڑی بروقت سگنل سے نہیں ہٹ سکی۔