لاہور(سپورٹس رپورٹر+نمائندہ سپورٹس) چیمپیئنز ٹرافی کے فائنل میں بھارت کےخلاف سنچری سکور کرنےوالے فخر زمان کے اعزاز میں بحریہ ٹاون کے ملک ریاض کے نواسے بلال بشیر ملک کی جانب سے تقریب ہوئی۔ بلال بشیر ملک نے فخر زمان کو 20 لاکھ روپے کا چیک دیا۔
اس موقع پر فخر زمان کا کہنا تھا کہ وہ بحریہ ٹاون کے ملک ریاض اور بلال بشیر کے مشکور ہیں جنہوں نے میرے اعزاز میں تقریب منعقد کی اور میری حوصلہ افزائی کی۔ فخر زمان کا کہنا تھا کہ جیت کے بعد پوری قوم کی جانب سے جس طرح کا استقبال کیا جا رہا ہے ان کو الفاظ میں بیان نہیں کیا جا سکتا ہے۔ مستقبل میں بھی اچھی کارکردگی کا مظاہرہ کرنے کی کوشش کی جائے گی کوئی بھی ٹورنامنٹ آئے گا میری کوشش ہوگی اپنی کارکردگی سے ٹیم کی جیت میں اہم کردار ادا کروں۔ فخر زمان کا کہنا تھا کہ شرجیل خان کی ٹیم میں موجودگی کے موقع پر کبھی سوچا بھی نہیں تھا کہ پاکستان کی طرف سے کھیل سکوں گا۔ اﷲ تعالٰی کی خاص مہربانی سے پاکستان کی طرف سے کھیلنے کا موقع ملا۔ تقریب کے میزبان بلال بشیر ملک کا کہنا تھا کہ فخر زمان نے فائنل میں بھارت کے خلاف سنچری سکور کی تھی اس وقت ہی انہیں انعام دینے کا اعلان کر دیا تھا۔ ہمیں فخر ہے کہ پاکستان ٹیم نے فائنل میں بھارت کو شکست دیکر پوری قوم کا سرفخر سے بلند کر دیا ہے۔