ٹوبہ ٹیک سنگھ (نامہ نگار+نمائندہ خصوصی) وزیر اعظم میاں نواز شریف آج 7جولائی جمعہ کو حویلی بہادر شاہ میں پاور پلانٹ کاافتتاح کریں گے ،ٹوبہ ٹیک سنگھ سے چند کلو میٹر کے فاصلہ پر واقع حویلی بہادر شاہ میں وزیر اعظم کی آمد کے پیش نظر ٹوبہ ٹیک سنگھ ،شورکوٹ کینٹ اس سے ملحقہ علاقوں میں سرچ آپریشن کے دوران سینکڑوں گھروں کی تلاشی لی گئی ، ہزاروں لوگوں کی بائیو میٹرک نظام کے ذریعے شناختی تصدیق کی گئی ۔ ڈسٹرکٹ پولیس آفیسر عثمان اکرم گوندل اور ڈپٹی کمشنر معظم اقبال سپرا سمیت دیگر ضلعی افسران ڈویژنل اور صوبائی افسران کے ہمراہ شورکوٹ کینٹ آمد پر انکے استقبال میں شریک ہوں گے ۔علاوہ ازیں لاری اڈا ٹوبہ سے مبینہ دہشت گرد کو حراست میں لیکر اس کے قبضہ سے بارودی مواد برآمد کرلیا۔ ذرائع کے مطابق سی ٹی ڈی کی ٹیم کو اطلاع ملی تھی کہ تحریک طالبان کا کارکن عبدالرشید لاری اڈا ٹوبہ ٹیک سنگھ میں موجود ہے۔ ملزم نے گھی کے ٹین میں بارودی مواد چھپا رکھا تھا جس میں 4 ڈیٹونیٹر‘ سیفٹی فیوز‘ بلیک پائوڈر‘ بال بیئرنگ‘ لوہے کے کیل‘ 30 بور پستول‘ میگزین اور گولیاں شامل ہیں۔ سی ٹی ڈی نے دہشت گرد کو نامعلوم مقام پر منتقل کردیا ہے۔