پاکستان اور ورلڈ الیون کے درمیان سکواش سیریز آج شروع ہوگی
اسلام آباد(سپورٹس رپورٹر)پاکستان اور ورلڈ الیون کے درمیان سکواش سیریز کا آغاز آج 12جولائی سے اسلام آباد میں ہوگاجبکہ مصر کیساتھ سکواش سیریز 15 اور 16جولائی کو ہوگی۔ آج پاکستان اور ورلڈ الیون کے درمیان سکواش سیریز کا پہلا میچ سہ پہر4بجے ورلڈ رینکنگ نمبر 33ہانک کانگ کے کھلاڑی لیو او اور پاکستانی کھلاڑی فرحان زمان کے درمیان جبکہ دوسرا میچ شام ساڑھے پانچ بجے ورلڈ رینکنگ نمبر 51امریکی کھلاڑی ٹاڈ ہیئرٹی اور پاکستانی کھلاڑی اسرار احمد کے درمیان کھیلا جائے گا۔کل 13جولائی کو پہلا میچ سہ پہر4بجے ورلڈ نمبر 44فرانسیسی کھلاڑی لوکس سرمے اور پاکستانی کھلاڑی احسن ایاز کے درمیان ،دوسرا میچ شام ساڑھے پانچ بجے ورلڈ نمبر 53برطانوی کھلاڑی ناتھن لیک اور پاکستانی کھلاڑی عماد فرید جبکہ تیسرا میچ شام ساڑھے چھ بجے ورلڈ نمبر 35مصری کھلاڑی کریم الفتحی اور پاکستانی کھلاڑی فرحان محبوب کے درمیان کھیلا جائیگا۔پاکستان اور مصر کے درمیان سکواش سیریز کا آغاز 15جولائی سے ہوگا ۔
